Jozua 15
01Lu van stam Juda kregen bie t lötten t laand dat in t zuden aan grèns van Edom tou gaait, aan woestijn Sin tou, haildaal in t zuden.
2-4 Heur grèns aan zuudkaant begunde bie zudelke punt van Zoltzee, den onder Schorpiounenpas deur, noar woestijn Sin tou omhoog bie zuudkaant van Kades-Barnea langs, bie Chesron langs omhoog noar Adar en mit n bocht noar Karka, bie Asmon langs, kwam grèns bie beek van Egypte oet en doar bie langs laip e op n duur aan zee tou. Dat is veur hail Israël zuudgrèns.
05Oostgrèns van stam Juda was haile westkaant van Zoltzee tot doar Jordaan in Zoltzee oetkomt.
Noordgrèns begunde op aigenste stee en
06den omhoog noar Bet-Chogla tou, boven Bet-Araba langs en omhoog noar stain van Bohan tou (dij Bohan was n zeun van Ruben).
07Wieder van daal Achor omhoog noar stad Debir en den mit n bocht noar Gilgal, stoef tegen Adummim over. Pas aan zuudkaant van beek, bie drinkeldòb van Semeswèl langs komt noordgrèns den oet bie Rogelwèl.
08Doarvandoan ging grèns omhoog deur t daal van Bin-Hinnom noar zudelke baarghelgen van Jebusietenbaarg, dat is te zeggen van Jeruzalem. En doarvandoan noar top van baarg dij aan westkaant van t Hinnomdaal ligt en dij t Refaïetendaal aan noordkaant ofsloet.
09Den muik grèns n bocht van baargtop òf noar Me-Neftoächwèl en kwam zo bie Ijjim op baarg Efron, en weer n bocht noar Baäla, dat nou Kirjat-Jearim hait.
10 Van Baäla weer n bocht noar t westen tou, noar baarg Seïr, en wieder bie noordelke helgen van baarg Jearim langs (dij nou Kesalon hait), en den omdeel noar Bet-Semes en wieder noar Timna,
11 doarvandoan noar noordelke helgen van Ekron, mit n bocht noar Sikkaron, den bie baarg Baäla langs noar Jabneël, en op t lest kwam e oet bie Grode Zee, dij westgrèns van lu van Juda was.
12 Dit wazzen rondom grènzen van stam Juda.
|